اسكندرانى من يومى

اسكندرانى من يومى

اسكندرانى من يومى
راجل قوى ومالى هدومى
ولا عمرى موجة تهزنى وانا بحكى للبحر همومى
اسكندرانى واصلى مصرى خفيف جرىء جدع من يومى
بحب اعيش فى اسكندرية ومش بحب ولا حته تانية
زى السمك جوة المية لو طلع برة ميعيشش ثانية
قالوا ياما كتير علينا صيادين ورجالة مينا
قالوا ياما كتير علينا فى الصبر والشدة تلاقينا
والفرح ميكملش الا بينا
وفى اللى قالوا علينا غابة
غدارين زى الديابة
ولا شافونا ولا عرفونا وبكلامهم ده ظلمونا
م البداية قال اسكندر اسكندرية دى مملكتى
ومن يومها للنهاردة اسكندرية دى حبيبتى
وعمرى مانسى جميل حبيبتى لما يقولولى يااسكندرانى
وقلبى يقوى ده انتى سيبتى جوة منى ليكى اغانى
الله عليكى لما غنالك يااسكندرية يامجننانى
ده الحجار اللى ياما عاش فيكى وقال اجمل اغانى
وكل اللى قال فيها كلمة ردت عليه بالف نعمة
يااسكندرية بحرك دوا اي انسان
يااسكندرية بحرك الهام اى فنان
يااسكندرية مهما قالوا فيكى كلام مايوصفوكى
ده اللى فيكى مهما شافوا برده لسه مابيشوفوكى
بحب فيكى كل مافيكى واحلى ما فيكى حياتى بيكى
بشوف فيكى وقت الصبى واهلك وناسك الطيبة اللى دموعهم قريبة وميستحملوش شىء عليكى
يارب عمر فيها اكتر يارب زود فيها خيرها
الله عليكى الله اكبر يارب جمل في مصيرها
يا اسكندرية فيكى امى وابويها واهلى واصحابى
يا اسكندرية ليكى حبى ده انتى اهلى واعز اصحابى
بشوف ف اهلك الوفا بحس ف حضنك الدفا
وكانت امى والرحمة ليها
كانت تاخدنى وانا بين ايديها
وتحكيلى عاللى بيكى واللى كان متربى فيكى
واللى خانك واللى باعك واللى ضيع عمره ليكى
ومن يومها يااسكندرية وانتى غالية كتير عليا
ومهما روحت اى مكان
مبقولش غير اسكندرانى من يومى راجل قوى ومالى هدومى
__________________

مبقولش غير اسكندرانى من يومى راجل قوى ومالى هدومى
__________________

بس بيقولو وراء كل اسكندراني امرأة عظيمه

تحياتي

الحبيب الغالي