تسريب الامتحانات ومنظومة الفساد

من اكتر من 15 سنة وفى واقعة كانت الأولى من نوعها تم تسريب إمتحانات الثانوية العامة بالإسكندرية وتم الكشف عن تنظيم يحاكى النظام الفاسد بالبلد كلها .. ياريت محدش يتفضل مشكورا ويلفت إنتباهنا إن الضرب بيد من حديد على يد الفاسدين تحسب للنظام ويرجع للقضية ويشوف ملابساتها .. المهم .. رئيسة التنظيم طبعا سيدة ودول هن اللاتى يحكمن ويديرن من الكواليس الفساد فى مصر .. زوجة فنان شهير وإبنها فنان شهير بالعافية ولزوجها مسرح بإسمه .. الشبكة تم الإعلان عنها واللى أعلنوه أن كل اللى حصل كان لجل عيون الإبن الفالته .. ولن أطيل لأنها كانت قضية عجيبة وهذه الريسة خرجت مؤخرا من محبسها بعد قضاء فترة العقوبة وجارى الإعداد لأعمال أخرى ومن الله التوفيق .. فنانة شهيرة أيضا لكن شهرتها بجلاجل سحبت أخوها من قضية تسريب إمتحانات بإحدى الكليات وعرفت بقضية الرشوة الجنسية بجامعات مصر .. واضح فيها ترسيخ مفهوم الوساطة اللى غرقونا فيه حتى أصبح العمل المفضل والأفضل بين الشباب والفتيات اليوم .. لازم نربط بين تلك المساخر ومايحدث اليوم .. لازم نعى أن الفساد واحد .. ويتجول حيثما أراد .. فى شتى المجالات .. هو الذى دفع بشاب أن يزهق روحه بيده وهى حادثة شهيرة بمصر لرفضه فى إحدى الوظائف رغم تفوقه لأنه إجتماعيا طلع ابن ناس فقراء .. الساحة على إتساعها تعج بالفسدة والمفسدين .. والنظام يرعى هذا بجد وإجتهاد وإقتدار .. والجميع فى وضع الرضوخ والإستسلام وجارى تمرير كل شئ وكل بحسب قدرته .. بجريدة المصرى اليوم المصرية العدد 1465 فى 17/6/2008 صفحة 15 النصف الأعلا عامودين على اليسار كتب هذا العنوان (( المركزى للمحاسبات يحيل مسؤولين بمدينة شرم الشيخ للمحاكمة التأديبية )) .. عندما تقرأ الخبر وتفاصيله ستقف على حقيقة أن النظام الحاكم فعلا هو الراعى الرسمى للفساد فى مصر .. لأن الحقائق يتم طبخها وإعادة تغليفها وعرضها بشكل مشرف للنظام .. كما المسرطنات والنافقة والمنتهية الصلاحية والتصقيع والغسيل وألف مبروك بمحافظتى حلوان وأكتوبر والحدق اللى يفهم بعد 20 سنة من الأن حيكون فيه إيه ؟ والشكل العام هيكون إزاى .. ومين دلوقتى اللى ماسك الريشة وبيرسم اللوحة اللى حيتفرج عليها الناس .. الناس اللى بتتفرج وبس .