و كما نرى من الصورة فقد كانت كل جماهير مصر تقف خلف مدرب المنتخب حسن شحاته و تشجع فريق
بلادها بكل قوة مثلما يفعل كل شعوب العالم و لن انسى ابدا موقف تلك الجماهير عندما اعترض ميدو على
اخراجه من الملعب فى مباراة كوت ديفوار سنة 2006 و كيف استهجنت الجماهير تصرفه وآزرت حسن
شحاتة بكل قوة ,,
الآن الوضع يختلف كثيرا
احمد شوبير يحارب حسن شحاتة بكل قوته بسبب ان حسن شحاتة رفض ان يجرى احمد شوبير مقابلات
تليفزيونية مع لاعبى المنتخب بصفته مقدم لاحد البرامج فى قناة دريم انذاك و كان المنتخب وقتها فى مهمة
صعبة و من يومها و شوبير لا يحب حسن و يحاربه و الجميع يعلم هذا
جمهور الاهلى او بعض جماهير الاهلى اصبحت تكره حسن شحاتة جدا لانه تمسك بالحضرى بالرغم
من ان جمهور الاهلى اصبح لا يحب الحضرى , و يطالب جمهور الاهلى حسن شحاتة بمراعاة مشاعرهم
و ان يلفظ الحضرى من المنتخب و يطرده شر طردة
بعض تلك الجماهير اصبحت تذهب لمباريات المنتخب لسب الحضرى لا لتشجيع فريق بلدها فالامر لا يعنى
لها شيئا لأن الأهلى فوق الجميع كما يقولون و اللى يهرب من الاهلى يبئى خاين و يقتل او يصلب او تقطع
ايديه و ارجله من خلاف او ينفى من الارض ولا حول ولا قوة الا بالله
ماعلينا
حسن شحاتة رجل ذكى و انا واثق جدا انه لو كان عنده البديل لما اختار هذا الطريق الذى لا مثيل له الا
عندنا حيث العجائب و الغرائب دائما و ابدا
هو هو الجمهور اللى بيشتم الحضرى و زعلان من حسن انه مصر عليه , هو هو اللى كان بيقول نكت على
عبد المنصف بس احنا شعب عاطفى بننسى بسرعة
ياترى حسن شحاتة لو ما اختارش الحضرى يختار مين يقف حارس مرمى ؟؟
مين عنده كفاءة يحمى مرمى مصر و الجمهور يثق فيه و فى قدراته الفنية ؟
الاهلى نفسه محتاس و عمّال يدور على حارس مرمى لأن معندهوش حد كفاءة يحرس مرماه بنفس مهارة
عصام و قدراته ؟ اذن البعض من جمهور الاهلى عايز حسن شحاتة يحتاس برضو و يشوف اى حد يقف
حارس مرمى المهم عصام مايقفش ؟؟
معقولة ممكن يكون التفكير بالطريقة دى ؟؟
طبعا ده كلام مش مظبوط و الامور تسير بشكل عاطفى ليس اكثر و لو كان امام حسن شحاتة حارس اخر
يثق فى قدراته لاختاره فورا عشان يرحم نفسه من وجع القلب ,,,
محسن صالح اتعمل معاه نفس الموقف برضو بسبب حسام حسن زماااااااان و من نفس الجمهور
اذن الموضوع كله من وجهة نظرى الشخصية مجرد عواطف و تعصب ليس اكثر ,,,
شوف يا ابو على لو وصلت نهائيات كاس العالم ح يبئى انجاز يتحسب لك و يتحط فى تاريخك لأنك
بتلعب بمنتخب مصر ضد مصر و اعلامها و جمهورها و لو ما وصلتش ولا يهمك , عادى خالص ,
قبلك عشرات المدربين محدش حاربهم و ماوصلوش برضو , يعنى لو ماوصلناش مش ح تكون السبب
ابدا فقد فشل الجميع قبلك ماعدا الجوهرى سنة 90 ووصلنا بشق الانفس و بدعاء الوالدين و شدى حيلك
يا بلد , يعنى ولا فنيات ولا خطط ولا بتاع , مجرد نصيب و مقدر و مكتوب ع الجبين مش اكتر !!!!!!!!!!!
مدرب المنتخب وظيفته انه يختار احسن الموجودين ووظيفتنا نوفر له الامكانيات و نشجعه و نحاسبه فى
الاخر
الراجل بيتحارب من كل صوب و حدب و ربنا بيكرمه و ماشية معاه يبئى ليه ما نشجعش منتخب بلدنا
او نجيب له حارس مرمى كويس و بلاها الحضرى , بدل ما شكلنا وحش كده و احنا بنشتم منتخب بلدنا ,,
اى مدرب عاقل لن يعادى جمهور الاهلى لأنهم كثيرون و يشكلون ضغطا نفسيا هائلا عليه و على اللاعبين
و حسن شحاتة مجرد رجل لم يجد بديلا ليس اكثر و النجاح مجد شخصى له و الفشل لا يحتسب ضده كما
قلت فقد سبقه العشرات من المدربين و لم ينجح منهم احد و العيب ليس فيهم ايضا و انما هى ادارة فاشلة
و عواطف برية لم تروض بعد
اذن حسن شحاتة برئ من كل الاتهامات و ليس امامه اختيارات اخرى غير الموجودين و اى مدرب مكانه
كان ح يختار نفس الاختيارات , ياللا بينا نشجع منتخب بلدنا الماتش اللى جاى و مش مهم مين يلعب
المهم ان اللى بيلعبوا اسمهم منتخب مصر و ان دول احسن لعيبة فى مصر و الحضرى سواء حبيناه
او كرهناه احسن حارس مرمى فى مصر
انا شخصيا ماكونتش بحبه لكن لما حد يسالنى و يقول مين احسن حارس مرمى فى مصر كنت بقول الحضرى
و عبد الواحد السيد حظه وحش و منصف حبة فوق و حبة تحت و محمد صبحى ضيع مننا بطولتين ابن الايه
الامر واضح يا جماعة و الراجل معندهوش اختيارات فعلا ,,,,
السبت يوليو 12, 2008 5:14 am