كلنا فاكرين فيلم 'صلاح الدين' بطولة العملاق 'أحمد مظهر'.. أعتقد أن الفيلم ده لسه الناس بتتفرج عليه لحد دلوقتي. وبتقول جملته المشهورة: يا عزيزي 'آرثر'.. تعالوا نشوف العملية أزاي دلوقتي. مشهد 1 البداية مشهد داخل لغرفة اجتماعات مجلس الزمالك في ميت عقبة.. الكل قاعد وعلى وشه غضب وحوسة وكل واحد بيتكلم في المحمول وده بيكلم اللي جنبه وتاني بيقرأ جورنال بعنوان بارز (نكبة في الزمالك - و'مرتضى' يهد المعبد في ميت عقبة - 'هولمان' هربان و'عباس' في التوهان) الجرسون يدخل ليعرف الأعضاء عايزين يشربوا إيه.. الأعضاء باستياء: هات زفت سادة، وأنا هات لي سم بالفتلة، أي مخروب ساقع من عندك يمكن يطفي اللي جوايا.. بعدها يدخل الميجور 'عباس' بخطوات ثقيلة ويجلس على مقعده في صدر الترابيزة وبيقول بيصوت لا يكاد يسمع: عاملين إيه يا جماعة.. ويرد عليه من حوله: ربنا أعلم بينا، الله يسامحهم واجعين قلبنا وبطننا ودمغنا ده إحنا مش عارفين نشم نفسنا.. الميجور 'عباس' بصوت مكسور يقول: إيه أنا مصدّع والبورصة عاملة عمايلها معايا وأنا مش ناقص وجع قلب يا عالم حتى الأوليمبي كمان جبنا لمس أكتاف. ده الواحد مش عارف يعمل إيه للناس دي فلوس وواخدين عقود مجددين بلاوي سوده ومن لحمي الحي وواكلين.. يرد عليه واحد من الأعضاء من آخر الترابيزة ويقول له: دي بشاير المستأخر 'مورتي' يا ريس إنت ما شفتش يا ميجور ده أول ما عمل وقفة قدام المجلس القومي للشباب والفريق أتلخفن ووقع على طول يا راجل يعنى المستأخر ده وقف ولا قعد على طول الدنيا خربت ليه يعني.. ويقول واحد تاني: يا ميجور العيال خايفة مرتبها يقف لو سعادتك مشيت وجه المستأخر.. ويرد الميجور بصوت جهوري مبحوح: مين اللي يمشي ده على جثتي.. ويرد الدكتور 'محمد عامر' بعد أن يقول بصوت غير مسموع: أنا إيه اللي جابني هنا؟! ثم يوجه كلامه للميجور ويقول' المشكلة في الإدارة يا عزيزي 'آرثر'.. يقول واحد من محاسيب الميجور: 'آرثر' مين يا دكتور؟! هي الهزيمة من الأوليمبي عملت عمايلها معاك ولا إيه ده الميجور؟!.. و يقول 'عبس': بَلا إدارة بلا يحزنون هو أنا ناقص؟ أنا معايا شوية قرارات امضوا عليها خلوا الجمهور يحل عننا وأعرف أشوف شغلي اللي واقع. مشهد2 المشهد خارجي على أحد المقاهي السياحية ترابيزة يجلس عليها أحد مسئولي اتحاد الكرة وأمامه شخص يلعب معه الدومينو يفهم بعد ذلك أن هذا الشخص هو أحد المندوبين عن الأندية الذي سوف يصوّت في الانتخابات التي يتصارع عليها 4 مرشحين على الرئاسة و16 على العضوية قبل التصفية. مسئول الجبلاية: إيه يا عمنا نظامنا إيه السنه دي؟ المندوب: يحلوا الكيس يا باشا عشان القشية تتعدل وأنا تحت أمرك وأمر العمدة 'زاهر'. مسئول الجبلاية: يا عم ما إحنا عينّالك ابن أختك وابن سلفك المندوب: يا باشا أنتو ما بتفتكروناش إلا كل انتخابات وجمعية عمومية مسئول الجبلاية: طب مش بتاكل الكباب والكفته وبتنام يومين في فندق أحسن من بتاع بيت العمدة عندكم. المندوب: يا بيه ده انتم بتاكلوا من ورانا بلاوي سودة هو أنت كنت هتعرف تركب العربية دي -ويشير على سيارة أمامهم- يا عم ما تخلي الطابق مستور إنت ناسي لما كنت زمان.. ولا على إيه بلاش.. مسئول الجبلاية وهو بيرمي بالزهر وبيضرب القشاط: إيه إحنا هنفتق لبعض ولا إيه ده أنا هاجيب لك حاجة في الإدارة تحلي بقك وتبقى معانا هنا المندوب: يعني هالهط زيكم؟ مسئول الجبلاية: يا أخي حط لسانك في بقك المندوب: طب والإدارة هتوافق؟! مسئول الجبلاية: إدارة مين يا ولدي؟ أبقى سلم لنا على الإدارة يا عزيزي 'آرثر'. مشهد 3 مشهد خارجي في حديقة النادي الأهلي
'حسن حمدي' و بجواره 'طارق سليم' و'الخطيب' و'هادي خشبة' يسيرون متوجهين لمقر فريق الكرة. 'حسن حمدي': نفسي يا جماعة نروح اليابان تاني 'طارق': كله بأمره يا أبو 'علي' 'حسن': ما أكدبش عليكم العملية صعبة 'الخطيب': بصراحة أيوه 'هادي': ويا كابتن اليابان هتخدمنا قوي في الانتخابات 'حسن' ضاحكا: ما أنت عرفت اللعبة أهو يا 'هادي' 'طارق': المهم الجمهور يفرح ويرقص 'حسن': طب نعمل لهم إيه عشان نخلي الولاد ولعة؟ 'طارق': شوف الإدارة بتقول نوفر لهم كل حاجة وبعد كده نحاسبهم 'حسن': وهو أنا وأنتم والمجلس بنعمل غير كده يا عزيزي 'آرثر' مشهد4 قبل مباراة الأوليمبي.. ظلام دامس في ديسكوتك بأحد الفنادق المطلة على النيل... ثلاثة لاعبين من الزمالك أحدهم إفريقي جديد والآخر مدافع يمين ابن لاعب سابق في الزمالك والثالث لاعب جديد من ذئاب الجبل يلعب للزمالك.. والاثنين يسكّرون مع اللاعب الإفريقي وخطيبته البيضاء وصديقة الإفريقي الضخم..... هذه المرة الواقعة حقيقية؛ هذا لو أرادت إدارة الزمالك الحقيقة.... وسلم لي على الإدارة يا عزيزي 'آرثر'.
وسلام عليكم
| 
الجمعة أكتوبر 31, 2008 9:53 am