موضوع: فستان الفرح على الطريقة الحديثة الجمعة أكتوبر 31, 2008 10:28 am
قراء كتير جدا طلبوا إننا نقدم موديلات جديدة لفساتين الزفاف، علشان كده قررنا في الموضوع ده إننا نقدم استايلات جديدة للمحجبات وغير المحجبات ومش كده وبس ده كمان هنقول أفكار جديدة لاختيار الفستان..
علشان كل بنت مليانة تظهر رفيعة، وكل بنت نحيفة تظهر بشكل كويس..
وده طبعا بيعتمد على معرفة أسرار المهنة اللي هتقول لنا عليها مصممة الأزياء "سهير مسعود" في حوار مختلف وجديد جدا جدا عن فستان ليلة العمر... كل البنات بتسأل تختار الموديل الروش والموضة اللي تعجبها ولا تختار اللي يناسب جسمها وحجمها؟! أحلى موضة إن البنت تلبس اللي يناسبها وتاخذ من الموضة اللي يناسبها ونصيحتي لأي عروسة لازم تعمل ريجيم قبل الفرح علشان يسهل عليها اختيار أي موديل وتشترك مع مصمم الأزياء في اختيار الفستان المناسب لها. هل الكورسيه بيساعد على اخفاء عيوب الجسم و إزاي أعرف الماركة الكويسة والمقاس المظبوط لأي جسم؟! فيه ماركة معروفة جدا اسمها "تريمف" الأصلي وكل البنات لازم تحفظ الماركة دي كويس وتركز إذا كان الكورسيه "شورت" أو "براه" وهي ماركة متوفرة في "الكاش كورسيه" اللي هو عبارة عن "براه" ملتصق "بالشورت" مع بعض. وأنا أفضل "الكاش كورسيه" لأنه يتناسب جدا مع البنات الممتلئة من منطقة المعدة والأرداف لأن البنات لو اشترت "كورسيه شورت" هتلاحظ إن الكورسيه ضغط على منطقة الأرداف والمعدة ورفع الامتلاء من منطقة الأرداف إلى منطقة الوسط وتحت الصدر عشان كده بانصح "بالكاش كورسيه" عشان نضغط المنطقة كاملة من أول الصدر حتى تحت الأرداف. ولو مفيش "كاش كورسيه" نعمل إيه؟! نجيب "كب" لوحده "براه" وبعد كده نجيب شورت معدة، بعد كده نجيب دبابيس مشبك ونثبت الشورت بالبراه. هل الماركة دي غالية؟! أنا رأيي إن البنت لازم توازن يعني تشتري حاجة بــــ150جنيه وتعيش معاها مدى الحياة لأن الحمالات الأصلية لا تذوب ولا نشتري حاجة بـ 70جنيه وتعيش مدة قصيرة. لكن بالنسبة للبنت الرفيعة وخاصة اللي صدرها صغير جدا تعمل إيه؟! أنا عندي مقاسات مختلفة من "البراه" وأركّب "البراه" في الفستان مع الدعامات المعدن اللي بتكون في الكورسيهات وبتضم الجسم كويس وأجهز كل حاجة داخل الفستان علشان يكون جاهز للبس على طول. بالنسبة لنوعية قماش الفستان هل اختيار نوع القماش بيتوقف على حجم الجسم؟! طبعا شكل القماش ورسمته له دور كبير في تقليل حجم الجسم يعني مثلا... • لو عاوزة أصغّر أي منطقة أصمم خطوط رفيعة طولية وأعمل مكس بين الورود والخطوط. • ولو منطقة الوسط مليانة أعمل خطوط طولية. • ولو الصدر صغير أعمل ورود على منطقة الصدر. • ولو الصدر كبير أعكس الموضوع وتبقى منطقة الصدر خطوط طولية والوسط أصمم ورود. لو بنت بتعاني من ضخامة شديدة في الصدر تعمل إيه؟! مصمم الأزياء بتاعها يراعي إنه مايعملش تطريز على الصدر يعني تلت وتلتين بمعنى عند تلتين الصدر أقطع التطريز وأعمل ريهات بالجنب والتلت الآخر ريهات بالطول وده يساعد على إخفاء معالم الضخامة وما أقدرش أحدد حجم الصدر. لو بنت مليانة قوي ومش محجبة وعندها منطقة الصدر بالرقبة ضخمة جدا تعمل إيه؟! تعمل حاجة اسمها (كتف ساقط) علشان يقلل مساحة العرض من فوق ولو كانت محجبة نصيحتي لها إنها لا تبطن الكم ستان وممكن تبطن الكم تول إستريتش أو تبطن طبقتين شيفون وحتى كمان منطقة الصدر تبطنها شيفون أو تول إستيرتش. فيه بنت صدرها صغير ووسطها صغير لكن تعاني من ضخامة الأرداف تعمل إيه؟! تصمم الفستان زي ما هي عاوزة وتعمل وسع للفستان بعد 10 سم من الوسط وتعطي الوسع اللي هي عايزاه وكده يكون المنظر في النهاية إن الفستان شكله واسع. إيه الأقمشة الموضة في فساتين الزفاف؟! الشغل الهندي مع التول واللون الموجود في الخامات زي "السيلفر" و"الأوف وايت" والقماش "البروكار" المطبوع منه وفيه "التول المنقط" و"الأورجنزا". لكن البنت عجبها تصميم ورسمة معينين بس مش موجود لها قماش في السوق تعمل إيه؟! ده شغل مصمم الأزياء إنه يطرز ويصمم على القماش. إيه أكثر لون موضة: "الأبيض" ولا "الأوف وايت"؟! الاتنين موضة والأبيض ممكن تشتغل عليه بالسيلفر أو "الدهبي" والأوف وايت ممكن يكون كله أوف وايت أو نعمل مكس بين الأوف وايت والسيلفر. إزاي بتصممي إكسسوار فستان الفرح؟! أنا أحب آخد لون وحدة معينة من الفستان وأعمل إكسسوار وممكن أستبدل الإكسسوار بالورد يعني مثلا في الصورة كوليه من الورد الطاير بالإضافة إلى إني باعتبر "الشوز" من أهم إكسسوارات الفرح وبأصمم "دوبل سومل" وهو بيعطي علو للشوز فمثلا.. • لو الكعب 15 سم أصمم "دوبل سومل" 7 سم. • ولو الكعب 10سم أصمم "دوبل سومل" 5 سم. وده بيساعد على سهولة حركة العروسة أثناء الفرح بدرجة كبيرة. وهل الطرحة لها موضة منفصلة عن الفستان؟! هي الطرحة موضة لوحدها يعني السنة الماضية كانت الطرحة الإسبانيش اللي فيها كينار عريض موضة جدا وتنزل على الوجه من غير بيشة وأنا من الناس اللي عاشقة التراث ولازم أصمم طرحة بالبيشة علشان العريس يرفع الطرحة للعروسة وده من أهم طقوس الفرح وفيه شكل آخر من الطرح المنفوشة والعالية عن الرأس... وفي شكل آخر من الطرحة وهي الطرحة الملمومة البسيطة وتكون تحت الشنيوه أو فوق الشنيوه والموضة تختلف في الأطوال يعني السنة دي الطرحة القصيرة موضة وطرحة المحجبة لازم تكون طويلة ومصممة من الفستان والفستان المصمم على شكل ديل لازم يكون معاه طرحة طويلة. لكن هل طول الطرحة يعتمد على طول وقصر العروسة؟! أنا كمصممة أزياء أراعي تماما الأطوال يعني في الأول أسأل العروسة لو عريسها طويل أعمل كل التصميمات من أول الكعب لحد الشنيوه إنها تكون طويلة، ولو كان العريس قصير أقلّل في كل التصميمات ولو العروسة قصيرة لا يتناسب معها طرحة طويلة والعكس. أنا ملاحظة إن فيه صور فيها الشابوه بدل من الطرحة هل دي موضة؟! أحيانا بتكون فيه بنت روشة وتحب الافتكاسات ومش عايزة تعمل طرحة تقليدية زي مثلا "منى زكي" في "فيلم أفريكانو" كانت طرحة مختلفة وحلوة وممكن أعمل شابوه وطرحة في نفس الوقت والبنت تستبدلها خلال الفرح. هل "المدموزيل دونير" رجعت تاني من طقوس وأشكال الزفاف؟! أنا من المصممين المهتمين جدا بوصيفات الشرف (مدموزيل دونير) وبعتبرها برواز جميل لفستان الزفاف ويجب يكون عددهم 6 وأعمارهم مختلفة من 8 سنوات و12 ويكون كلهم موديل واحد وتصميم واحد وهتلاقي في الصور إن الوصيفات يكونوا من نفس شكل وفخامة الفستان ولو العروسة اعترضت ممكن آخد لون الورد أو الجيرب وأعمل موديل وتصميم للوصيفات. وتفتكري وصيفات الفرح شكل مكمل للفستان ولا شكل مكمل للفرح؟ ! أولا أنا أشعر إنه يوم الفرح يوم ملائكي والأطفال بيعطوني هذا الإحساس والعروسة بتكون ملكة والأطفال هم الوصيفات وأحيانا بيوزعوا الشيكولاته في الفرح وبأفضل إنهم يمسكوا الورود بدل من الشموع. ودي تشكيلة تانية من فساتين الأفراح العروسة و"المدموزيل دونير" وإلى اللقاء في العدد القادم
الجمعة أكتوبر 31, 2008 10:28 am
