أدخل وشوف كمية الدم اللي مغرقة الموضوع حاجة تشدك وتحرك أحساسك

بعد إذنك ممكن تدقق في الصورة اللي تحت دي..

بصيت كويس؟
أيوه؟؟

ولامؤاخذة اللي على اليمين دي.. "جاموسة".. Buffalo يعني لخريجي مدارس اللغات!

واللي على الشمال.. ومدبوحة ومسلوخة ومتعلقة دي برضه جاموسة.. Buffalo تانية يعني!

والحدث.. زي ما هو واضح عيد الأضحى اللي فات

وقبل ما حد يسن السكاكين ويتصور أن تحولت فجأة إلى "بريجيت باردو" الممثلة الفرنسية المشهورة اللي دأبت على مهاجمة المسلمين لأنهم يذبحون الحيوانات للأكل بطريقة تعتقد أنها غير مناسبة ودموية -وكلامها ده طبعا غير صحيح وغير منطقي ومعناه أنها لاتعرف شيئا عن قواعد الإسلام الصحيحة- خلينا نؤكد أن مافيش حد أصلا يقدر يناقش فكرة ذبح الأضحية لأن دي شعيرة إسلامية أصيلة، وبرضه طبعا مش هنتكلم عن طريقة الذبح لأن الذبح بالسكين هو الطريقة الإسلامية الشرعية الوحيدة لذبح الحيوانات من أجل الاستفادة من لحومها..

كل ما سنناقشه هو الصورة ليس إلا!

الصورة بقى فيها إيه؟

لو ركزت هتلاقي الجاموسة الحية بتبص للكاميرا وفي عينيها شعور عجيب بالخوف والرهبة!
طب والله ما بنهزر

تفتكر ليه بقى؟

لأن الناس الحلوين اللطاف اللي دبحوا الأضحية الأولى قاموا بتنفيذ عملية الدبح دي قدام الجاموسة الحية..

وده أصلا أمر نهى عنه الرسول (صلى الله عليه وسلم) بشدة حتى لاتتأذى الأضحية من مشهد ذبح الأضحية الأخرى..

مش كده بس..

ده الإسلام نهى كمان عن "سن السكاكين" أمام الأضحية لنفس السبب السابق.. أي حتى لاتتأذى ولايصيبها الخوف والفزع قبل ذبحها وفي الأوقات الأخيرة السابقة لذلك..

دي حاجة جميلة جدا وتظهر عظمة الإسلام مش في كونه بس يحافظ على مشاعر الناس وبعضها البعض بل ويصل ذلك إلى احترام الحيوان دوما حتى في ماقبل ذبحه..

هذه واحدة..

بص على الصورة دي بقى لو سمحت

شايف كمية الدم اللي مغرقة الأرض؟

أيوه؟؟

هتقول لنا "ما هو لازم دم.. أصلهم بيدبحوا بالمناسبة مش بيلعبوا بينج بونج.. دبح.. يعني دم مش محتاجة ذكاء دي"..

وإحنا برضه مش معترضين.. لكن الاعتراض هنا بقى في أن الدم بيفضل موجود في الشوارع وقدام البيوت بعد الدبح بوقت طويل في منظر "........" أوصفه بقى زي ما أنت عايز بس أكيد هو منظر بعيد كل البعد عن القول المأثور اللي حافظه كل واحد فينا وهو في الحضانة "النظافة من الإيمان" -هو مش حديث شريف بالمناسبة- لكنه يتناقض مع حديث نبوي شريف آخر نصه "الطهور - أي النظافة- شطر من الإيمان".

ليكن السؤال هنا
إزاي بنعمل التناقض ده بنفس راضية

نذبح الأضحية -وهي شعيرة إسلامية أصيلة- لكن بعد كده بيكون مكان الدبح غير نظيف وملوث وهو أمر ضد.. "الطهور شطر من الإيمان"؟

يعني إزاي بنعمل الأمر ونقيضه خصوصا فيما يتعلق بالأمور الدينية؟

خد عندك مثلا اللي بيحصل في كتير من بيوت ربنا.. المساجد يعني.. وخصوصا مساجد "آل البيت" زي مساجد السيدة "عائشة" والسيدة "نفيسة" وسيدنا "الحسين"..

لو رحت هناك هتلاقي زحمة كتيرة وملكوت كبير.. ولأن ماحدش يقدر يفتش في نوايا الناس اللي رايحة فخلينا نفترض أن كلهم رايحين عشان يعبدوا ربنا وياخدوا نفحة روحية من هناك.. لكن النتيجة أنك هتلاقي في الأماكن الطاهرة دي واللي ليها قيمة كبيرة جدا عند المسلمين سلوكيات غريبة..

أكل وشرب ونوم وخناقات وصوت عالي وضحك وقهقهة وناس كتير بتتصرف وكأنها في الشارع ولا مؤاخذة مش في بيت من بيوت الله..

نفس التناقض

شكل الفعل الظاهري تقرب إلى الله
لكن جوهر الفعل أشياء لاعلاقة لها بالدين من أصله

بل وخلينا نكون صرحاء

دي أفعال بتسيء إلى الإسلام..

ياريت حتى أنت تقول لنا على أمثلة زي دي
حاجات بتشوفها ويمكن بتعملها أو كنت بتعملها
تبدو وكأنها من أجل الدين
لكنها بكل أسف ضد الدين تماما..

وياريت كمان تفتكر تقول لنا

إيه الأسباب اللي بتخلي كتير من المصريين يعملوا الحاجات دي؟
وإزاي نعدل في السلوكيات دي
مننا إحنا ومن داخلنا إحنا
بعيد عن أي "بريجيت" وأي "باردو"!