الوضع فى غزة000الوضع التالى

28 ديسمبر, 2008

الوضع في غزة...الوضع كالتالي

الوضع كالتالي...
يمسيكم بالخير مدام صعب احنا نتمسى فيه...
من زمان بحكي بدي أكتب إشي و بصير إشي يمنعني غالبا كان انقطاع الكهربا ضمن كل اشي بغزة أو بداية مرحلة جديدة و هي "شبة الشغل".
بس انا بدي أحكي عن اللي بصير هلأ بغزة...عمليا الطيارات معبية السما و عمليا فيه أباتشي عندي بالغرفة !
اليوم الساعة 11 و نص أو إشي زي هيك كنت رايح على المكتب و صارت أول ضربة...
حالة من الهستيريا بالشارع...
الناس بتتجارى كل مكان...
و السيارات كلها صارت ماشية بسرعات مختلفة أقلها هي 700 كيلو بالربع ثانية !
نزلت من السيارة ونا مش عارف ايش بدي أعمل تحديدا...متوتر و خايف و &^%$ و بدفن !
قلت أطلع على الطابق العاشر و بعدين حكيت كل العمارة صحفيين ممكن جدا تنخبط العمارة...فضلت أروح جهة اليمين صارت خبطة جامدة ناحية المجلس التشريعي...الناحية التانية السرايا و هو مركز أمني فحكيت لا يابا مش رايح الجهة هادي...كل الأماكن مسكرة بفكرة انو ممكن تكون هدف...شبكة جوال كانت واقعة طبعا ففش مجال تحكي مع حد...واللي زاد الطين يورانيوم واحد جنبي تفركشت سلوك مخو و صار يجري بالشارع و يصرخ بأعلى صوت....قصف عشوائي قصف عشوائي...بديش أحكيلكو إنو لو أخدت جلسات "قطع خوفة " من هون لغاية ما يشاء الله مش حتشيل الخوفة عشان الخوفة كانت فوق الوصف !!
الحمدلله لقيت صديقي إسلام نازل من العمارة و وجهو أصفر...كلبشت فيه عشان مخين أحسن من مخ واحد بالظروف هادي...بس الشب كان مصدوم...من شباك مكتبنا ممكن تشوف بالظبط المجزرة اللي صارت بكل وحشيتها و جنونها...الحمدلله انو ما طلعت و شفتها بس صديقي شافها...الله يعينو و يعين كل أهل الشهداء و يصبرهم...
قدرنا كل واحد يوصل بيتو و يطمئن على الأهل و الأصحاب...الكل بخير بس اللي صار صابنا جميعا...
من وقها لهلأ و الكل قاعد بمر بتجربة جديدة...إنتظار الموت...ما بعرف ايش ممكن أسميها...
الساعة هلأ 12 و شوي و من نص ساعة تقريبا بدأ الفصل التاني من المجزرة / محرقة / مدبحة ...الخ
فبالي إشي واحد...المرحلة هادي في بس تلاتة بالصورة....إحنا و الياهود و رب العالمين....
ما ضل حد...
ولاااااااا حد...
غيرنا....
الباقي قرر إنو ما يكون موجود...
و إنشالله خير !

ملاحظة : رن الموبايل هلأ على رقم خارجي إتضح إنو تسجيل من الجيش الإسرائيلي بحكيلي إنو رح تاكل &*^ ازا كان عندك سلاح او زخيرة بالبيت....طبعا انا ما عندي إشي....بس برضو حاسس إنو رح اكل &^% !!!!!!