موضوع: إكسسواراتك مع بداية" 2009" آخر دلع وشياكة الجمعة يناير 02, 2009 12:59 pm
إكسسواراتك مع بداية" 2009" آخر دلع وشياكه
document.write("");
نفسك تعرفي إيه الإكسسوارات اللي ممكن تلبسيها في شتاء 2009 وأهو منها تكملي شياكتك وتغيري شوية من إستايل لبسك المعتاد ولا يهمك من أي حاجة طول ما احنا موجودين لأننا قررنا النهارده نكمل لك شياكتك بالعدد الجامد قوي ده تعالِ نشوف مع بعض الكوفيات لإعطاء لمسة أناقة
في البداية عايزين نتفق إن الكوفيات في الشتاء بتضيف لمسة أناقة وشياكة على اللبس مش كده وبس دي كمان بتدي إحساس بالدفء...متفقين على الجملة دي....
قولي متفقين
بما إننا متفقين يبقى عايزاكِ تعرفي شوية حاجات بسيطة قوي: 1. مش شرط إن الكوفيات تتلبس على اللبس الكلاسيك زي ما ناس كتير فاكرة لكن دى ممكن تتلبس على اللبس الكاجوال وبكده تقدر أي بنت لسه في الجامعة أو بتشتغل إنها تلبسها مع أي لبس عادي عندها. 2. عن طريق الكوفية تقدري تحسي بالتغيير والتجديد في لبسك وده عن طريق إنك تلبسي مثلا بلوفر أخضر وتلبسي عليه مرة كوفية خضراء ومرة تانية تلبسي عليه كوفية صفراء ومرة كوفية سوداء وبكده يبقى أنت لابسة نفس الطقم بس التغيير بيكون في لون الكوفية اللي أنت بتغيريها باستمرار كمان ممكن تحسي بالتغيير عن طريق تغيير ربطة الكوفية. 3. عايزاك تاخدي بالك إنك لو هتلبسي هدوم فيها نقوش كتيرة يبقى في الوقت ده تلبسي كوفية سادة ومايكونش فيها شراشيب من عند الأطراف.....لكن لو هتلبسي هدوم سادة يبقى في الوقت ده تقدري تلبسي كوفية فيها نقوش كتيرة أو فيها ألوان كتيرة متداخلة مع بعضها بس تاخدي بالك إن الألوان دي تكون مناسبة للون الملابس اللي أنت لابساها، كمان تقدري تلبسي الكوفية اللي فيها شراشيب من عند الأطراف.
4. أثناء النهار لو حسيتي إنك متضايقة من الكوفية ومش حابة تحطيها حوالين رقبتك ممكن في الوقت ده تربطيها في إيد الشنطة اللي أنت ماسكاها وبكده برضه شكلك بيكون في منتهى الشياكة.
بالنسبة لخامة الكوفية فيه خامات كتيرة قوي زي مثلا "الصوف"و"التريكو"و"الموهير" و"الكشمير"
وبالنسبة للأشكال وربطات الكوفية ففيه أشكال كتيرة ومتعددة والاختيار في النهاية بيكون على حسب ذوقك أنت فهتلاقي مثلا..
الكوفية الكاروهات القصيرة اللي تقدري تربطيها ربطة واحدة فقط
الكوفية الكاروهات الطويلة اللي هيساعدك طولها إنك تربطيها ربطتين متداخلتين مع بعض
كمان تقدري تجيبي كوفية كاروهات وتلفيها حوالين رقبتك بالشكل ده
كمان الكوفية المقلمة موضة جدا في الشتاء 2009
على فكرة الكوفية اللي فيها ألوان متداخلة مع بعضها هتساعدك تلبسيها على أكتر من طقم عندك
والكوفية السادة هي كمان موضة ممكن تربطيها ربطة بسيطة زي دي وتخلي الربطة بعيدة عن رقبتك شوية
أما بقى الكوفية القطيفة فمناسبة جدا في أيام الشتاء شديد البرودة
لكن الشكل الجديد ده هيديكِ إحساس بالفخامة والشياكة
ده كمان شكل بسيط للكوفية بيناسب البنت اللي بتحب البساطة
ومش شرط إن الكوفية في الشتاء تكون صوف أو تريكو دي ممكن كمان تكون قماش وفيه تطريز بسيط من على الطرف
أما الربطة دي فكانت موجودة زمان في السبعينيات ورجعت تاني موضة في شتاء 2009
الشال للبنت الباحثة عن الأناقة
دلوقتي الشال من قطع الإكسسوار الأساسية اللي مفيش بنت تقدر تستغنى عنها في الشتاء وده طبعا على عكس المقولة اللي كانت منتشرة زمان وهي "إن الشال موضة للسيدات الكبار في السن بس"... وبكده تقدر أي بنت رايحة الجامعة أو شغلها أو خارجة آخر اليوم إنها تلبس بادي أو بلوفر قصير وتلبس من فوقه شال. بس برضه لازم تاخدي بالك إن لون الشال يكون مناسب للون لبسك اللي أنت لابساه..وعلى فكرة ممكن لو عندك شال قديم وعايزة تجددي من شكله ممكن تجيبي خرز وتحطيه على الشال وبكده هتجددي من شكل الشال القديم اللي عندك.
بالنسبة لخامة الشال وأشكاله ففيه أشكال كتيرة وخامات متعددة فهتلاقي مثلا..
الشال الصوف السادة اللي ممكن ترفعي جزء منه على كتفك وتخلي الجزء الثاني نازل زي ماهو موجود في الصورة
الشال الصوف السادة اللي فيه شراشيب ممكن تحطيه على كتفك
شال كاروهات عريض فيه شراشيب من عند الأطراف
كمان هتلاقي إن الشال التريكو التقليدي موضة في شتاء 2009
أما ده بقى فشكل جديد للشال التريكو
كمان الشال اللي فيه نقوش ورسوم كتير موضة
والجديد في موضة الشال في 2009 هو وجود شال بجيوب زي ده
دي طريقة جديدة للف الشال
ودي كمان طريقة جديدة للف الشال على كتفك
الشابوه والكاب والآيس كاب والبيريه للبنت الجريئة الباحثة عن التميز
لو كنت بنت جريئة وعايزة تكوني متميزة عن باقي البنات اللي حواليك يبقى اختاري "الشابوه" أو" الكاب" أو" الآيس كاب" أو "البيريه" كإكسسوار ليك في الشتاء...
ودي مجموعة من الموديلات هتساعدك على الاختيار اضغطي على الصورة لمشاهدة المزيد من الصور
الجوانتي ليل ونهار الشتاء شديد البرودة
الجوانتي من مكملات الشياكة في الشتاء خصوصا في ليل ونهار الشتاء شديد البرودة.. والشتاء ده نازلة تشكيلة هايلة من الجوانتيات فهتلاقي جوانتيات تريكو وجلد وقماش وصوف..بس ياريت تاخدي بالك إن لون الجوانتي يكون مناسب للون الكوفية بحيث يبان كأنك لابسة طقم على بعضه..
ودي مجموعة من التصميمات ممكن تبصي عليها اضغطي على الصورة لمشاهدة المزيد من الصور
الجمعة يناير 02, 2009 12:59 pm
