مكالمات سرية4..فانتازيا الضحك

مكالمه 1 ( اتحاد الكوره ارحم جمهور الكوره )
الحاج خلاف : ألو كابتن زاهر انا غيرت اسم الواد بهلول ابنى لـ أحمد شوبير اسم مركب انا عارف انك بتحب الاسم ده , شوف له شغلانه في اتحاد الكوسه قصدي اتحاد الكوره ان شاالله حتى رئيس الاتحاد
سمير زاهر : رئيس الاتحاد.... وانا بقي اسرح بعربية كشري . مفيش شغل فوت علينا بكره
الحاج خلاف :ياباشا اتصرف واخترع منصب جديد لشوبير ابنى زى ما اخترعت لشوبير الكبير انت هتغلب .
سمير زاهر : شوبير بالنسبه ليا زى اى مواطن عادى .. انت فاكر ايه ياحاج خلاف
الحاج خلاف : حلوه النكته دى يا باشا . دى البلد كلها عارفه انت نايم في الدره ولا ايه. مشيها بتحب اسمه وخلى الطابق مسطور ...وكمان شوبير ابنى بيفهم في الكوره ده هو الوحيد في الكفر اللى اكتشف ان الكوره مدوره واكتشف كمان انها منفوخه هوا... ده مش كده وبس ده لاعيب كمان شاط الكوره من عند الترعه وداها البر التانى
سمير زاهر : كورة ايه بس مش مهم يكون بيفهم في الكوره خالص المهم بيفهم في البيزنس؟
الحاج خلاف : ياباشا ده خريج اداب الانجليزي...اهوه يترجملكم قوانين الفيفا اللى انتو مش عارفين تقروها , مره تطبقوا القانون غلط ومره تطبقوه نصه صح ونصه غلط كسفتونا... عارف يا باشا
سمير زاهر : ايه ياحاج مخلوف
الحاج خلاف : اعقل 3 في الكفر بتاعنا حاولوا يفهموا قرارت اتحاد الكوره ويطبقوها عارف حصلهم ايه
اول واحد العمده... حرامى سرق جاموسه من الزريبه بتاعته واتمسك راح العمده حط الجاموسه في السجن والحرامى في الزريبه ..تانى واحد الحاج حسان القاضي كان بيحكم في قضية قتل حكم بالاعدام على القتيل و60 الف تعويض للقاتل...والتالت الواد عوضين ابن ستيته زينة شباب الكفر بقي يمشي بالمقلوب بضهره يعنى ولما الناس تسأله ماشي كده ليه يقلك بطبق نظرية اتحاد الكوره الناس هيجلها منخوليا من القرارت بتاعتكم ارحمونا
مكالمه 2 ( نريد تنافس شريف بدون طرق ملتويه او بلطجه)
عطوه الحدق : الو مرتضي بيه... ممدوح عباس خلاص بح انا فرمتهولك وبكره هاعملك احمد شوبير ده بوفتيك
مرتضي بيه : برافو يا عطوه هايل قلى عملت كده ازاى
عطوه الحدق : انا فضلت ماشي وراه بالعربيه لحد ما وصل قناة دريم .ونزل بقي واد روش وومسبسب شعره كده والبنات ملفوفه حواليه وبتقلوا دقدق او حاجه زى كده المهم ا...
مرتضي بيه : مسبب شعره ايه وروش ايه ده عجوز واصلع .. وايه اللى وداه قناة دريم
عطوه الحدق : لابس باروكه وعامل عملية تجميل عيب يا باشا هو انا هاتوه عن ممدوح عباس
مرتضي بيه : جايز عرف اللى انا مخططه ليه فاتنكر... ممكن... المهم كمل
عطوه الحدق : وبعد كده ياباشا قعدت مستنيه قدام قناة دريم يجي ساعتين اول ما نزل طحنته ضرب والراجل يكدب ويقلى انا خالد الغندور والله خالد الغندور انا محايد بس على مين ده انا عطوه الحدق
مرتضي بيه : خالد الغندور!!! عطوه انت متاكد ان اللى ضربته ده ممدوح عباس
عطوه الحدق : عيب يا باشا ده انا حفرت صورته في الجمجمه هو انا هاتوه عن ممدوح عباس ده انا الحدق
مرتضي بيه : ثوانى يا عطوه معايا مكالمه على الويتنج ... الو ايوا يا حسن
حسن : مرتضي بيه كابتن خالد الغندور اتنقل القصر الفرنساوى في حاله خطره جدا بعد ما بلطجي اتهجم عليه
مرتضي بيه : خلاص يا حسن روح انت وانا هاحصلك مع السلامه .. انت يازفت يا عطوه انت يا غبي اللى ضربته ده مش ممدوح عباس يا متخلف ده خالد الغندور بندق
عطوه الحدق : ايوا صح البنات كانت بتقلوا بندق...... على العموم ملحوقه ياباشا االليله دى مش هتدعى الا وممدوح عباس بايت في العنايه المركزه انا لما احط هدف لازم احققه امال ايه
مرتضي : خلي بالك يا عطوه مش ناقصه مصايب وانا هاروح المستشفي لخالد الغندور
وبعد 3 ساعات
حسن : الو مرتضي بيه .. فيه بلطجى اتهجم على دكتور علاء صادق في الدائري وهو في حاله خطره جدا
مرتضي بيه : بتقول ايه .. ثوانى يا حسن منى معايا على الويتنج ايوا يا منى
منى : عطوه الحدق اتصل يا افندم وبيقول هو ضرب واحد تانى على الدائري بالغلط وبيقلك متقلقش ممدوح عباس هينام في العنايه المركزه الليله
مرتضي : الله يخرب بيته عطوه الغبي ده هيبيت الاعلامين كلهم في المستشفي امال لو مش مديله صورة ممدوح عباس كان عمل ايه ثوانى يا منى جاي تهبب ايه هنا ياعطوه اسمع انسي المهمه اللى طلبتها منك خالص
عطوه الحدق : انت هتعملى فيها مرتضي يا ممدوح يا عباس عليا انا الكلام ده اتشاهد على روحك
مكالمة 3 ( الإعلام هو عيون الجماهير.. يجب ان يتحرى الصدق)
شخرم ابو الشخاليل : الو شوكت ممكن اعرف قناة اموت بس اقول الحق..بتهاجمنى ليه دايما وعلى ابو شلته اللى سرق فلوس النادى يبقي اكتر واحد صرف على النادى واحسن لاعب في سنة 53 ده لو شاف الكوره بيتخض
شوكت رئيس القناة : شخرم بيه على ابو شلته اللى مرشح قصادك ده مثال للشرف انا بقول الحق ولو على رقبتى
شخرم ابو الشخاليل : اسمع انا هادفعلك قد اللى دفعهولك ابوشلته مرتين بس قلى هتقول ايه في فلوس النادى اللى لقوها في خزنتى , والهزايم المتتاليه في عهدى , والورق اللى انا زورته ,و منشآت النادى المتهالكه
شوكت :ياباشا انت خدت الفلوس من النادى وشلتها فى خزنتك لان ابو شلته كان عاوز يسرقها ,والهزايم المتتاليه لان ابوشلته دفع للحكام واللعيبه علشان يتغلبوا , والورق ابو شلته زوره ,والمنشأت ابو شلته هو اللى كسرها
شخرم ابو الشخاليل : كويس بس متنساش تقول كمان , انى بطل رياضي وقومى وان ابو شلته ده حرامى
شوكت :ياباشا انت اللى بنيت ابو الهول وابوشلته ده حرامى جزم طيب و قناة الصدق والامانه اللى بتساندك
شخرم ابو الشخاليل : هاسيبها اصل طلباتهم كتير وكمان مرضيوش يقولوا انى كنت السبب في فوز مصر بكاس العالم 1994 قال ايه!!!! الجمهور مش هيصدق
شوكت : سيبك منهم ياباشا دى قناة اعلانات ملهمش في البرامج الهادفه اللى بتقدمها قناة اموت بس اقول الحق
مكالمه 4 ( جماهير بورسعيد بتحبك يا حسام... الله يرحمك ياحاج متولي )
مرجان خادم الجان : الو محمد الطلب بتاع حسام حسن اترفض معلش بقي الله يعينك انت وجماهير بورسعيد
محمد (مشجع المصري ) : طلب ايه هو انا قلتلك عينه في الصحه.. انا قلتلك تعمل عمل يرجعه يدرب المصري
مرجان : انت فاكر العمل ده ايه.. العمل ده عبارة عن طلب مستوفي الدمغات وعليه طابع عفركوش وامضت اتنين عفاريت بيتقدم لرئيس الجان يأشر عليه ويختمه ختم شهبورش ويروح لادارة التنفيذ ياخد رقم ولما يجي دوره تبعت اتنين عفاريت ينفذوا العمل . انا خلصت الطلب وقدمته لرئيس الجان رفضه
محمد : ورئيس الجان يرفض الطلب ليه بس ... ومفيش حل تانى طيب
مرجان : اصل رئيس الجان ده يبقي قرين سمير زاهر وانا ماعرفش . والحل التانى نقدم التماس لمستشار رئيس الجان وانا عملت كده بس المستشار رفض عارف المستشار ده مين.... ده يبقي قرين احمد شوبير شفت المصيبه
محمد : يعنى اطفش من شوبير وزاهر فوق الارض الاقيهم تحت الارض كمان انا هسافر المريخ انا اتخنقت
مرجان : مش انت لوحدك العفاريت كمان عاوزانى اشوف صرفه لزاهر وشوبير اللى تحت الارض