لما تغيبى ....

أنا بتلخبط بين السكر
والملح ..
وأدورفى الدولايب
على حبه فرح ..
وملاقيتش ..
لما تغيبى ..
أنا والبيت بنتوه من بعض
وبابص فى وشه ما يعرفنيش
وبخاف من القطه لما تنونو
ومن صوت الريح
اللى بيهرب من بين الشيش ..
لما تغيبى ..
كل الحاجات الحلوه يا
حبيبتى
بترفض تعيش .. من غيرك
بينى وبينك ..
لما تغيبى ..
أنا بحتاس ..
بنسى العناوين
وأسامى الناس
باكل
وأشرب..
وأضحك ..
وأكتب ..
لكن كده .. من غير إحساس
وأنسى القهوه تفور على النار
ويروح الطعم
ويضيع الوش ..
لما تغيبى
كل المرايات يا حبيبتى بتكدب
وتغش ..
لما تغيبى ..
أنا عن روحى بغيب
وبحس أن النفس اللى فى
صدرى
غريب ..
أصل الدنيا يا حبيبتى
مش على طول بتروح
وتجيب ..
قلوب طيبه ..
أرجوكى .. خليكى قريبه
حتى لما تغيبى ..

أصل الدنيا
مش على طول بتروح
وتجيب ..
قلوب طيبه ..


سلمت اناملك اختي الغالي

خيك بالله
الفارس الحزين